وكان نفسى أكون
راكب حصان أبيض وأخطفك
يوميها وانتى ماشية مع البنات ع البحر ،
ما البحر كان صاحبى
والشمس والموجة ،
حتى دوسة خطاويكى
فوق رمال الشط ؛
كات صاحبتى
لكن إنتى …. لأه …. !
ما كانشى فى بينى وبينك غير تلات خطوات
يعرفهم الكون
والفراغ اللى ما بينى وبين رحلة وصولك
من أول الشوق
لحدة البعد
اللى خلانى بعيد ،
جوه تصاريف القدر …..
والقدر كان لعبة مجهولة
كلنا فيها
مين بيلعبها
ومين كسبان ومين خسران
دلوقتى ما يمهش ….
اللى يهم الوقتى
إن أنا وإنتى
خرجنا منها عارفين بعضنا …..
بعد هجرات المواضى ….
كات مواضى من جمال روحى وروحك
كات مواضى فيها عالمنا الجميل
الرحيم / البرىء / اللطيف ….
أنا وإنتى بقينا سطر فى كتاب الحكايات
أساطير بيحكوها المحبين
لما يسهر سهدهم …..
عارفه النهاردة كنت فارد شراع شوق قديم
من جوه الديوان اللى كتبتلك فيه القصيدة
اللى انتى عارفاها ….
لقيتك رمش عين مقفول بدمعة واسمك اللى كتبتى
كل حروفه فى أول الصحفات
رجعت لحد آخر مدى للشوق
لقيتنى برسمه ….
………
فرج الضوي
