الليل ولي
والعاشقين دراويش
فردوا قلوبهم مدد
طالوا السما
بلا ريش
لما المزاد اتنصب
باعوا الحرير
والخيش
حضنوا الجراح بالرضا
وقالوا الآهات
بقشيش ..
احنا اللي وجع الربابة
موصوف لأوجاعنا
يا شادد العود
عود وسمعنا
ولو الكلام عالجرح
ياعم جرحنا
خل الربابة في أنه
تقول للصباح
مايجيش…
******
الليل مش عامل وردية
بنص دوام
وما هوش تكشيرة أيامي السودة
لما بتتكحل
وبتقلع ملط
الليل عفاريت
بتشد الشريان المجروح جواك
وبتلعب نط الحبل
والشيخ اللي بيقرا عليك
من سورة الجن
بيلاغي مراتك قدامك
وكأنك مش موجود
ومراتك مش مريم
ومنتاش أيوب
فبلاش تتحجج بالنص المليان
واتعلم لضم الأحزان
في الخيط
………….
حسين صالح خلف الله
