وكانت كل اسبابها
خيوط واهية ..!!
عناكب شك بتحوط
على بابها ..!!
وانيابها اللى مغروسة
ف لحم الحى .. وعتابها ..!!
مرار طافح ..
وكانت .. غير كده إمبارح
وغيرها ..!!
الغموض والشك
عقدتها اللى كات تنفك ..!!
بالساهل ..
تزيد تعقيد ..!!
وتتساهل ..
مع اللى بيملك الجرأة
يمد الإيد ..!!
وينهش لحمها العريان
ويحدف جوه نارها “وقيد” ..!!
لغط .. وحديت ..
كلام فارغ ..
من اللى يهد .. مش أكتر
تتوه “ف” العد .. والتعديد
ولا تفكر ..!!
تشوف الحل ..
وأسألها ..
يميل حالها .. تزيد أكتر
كأن بعندها فيا
بتمحى الذنب .. و”تكفر” ..!!
وتنبش “ف” التاريخ وتقص
تجيب “النص” .. يتفسر
على قد اللى بيحسر
خواجة القلب .. و”إتمصر”
عشان “نوبل” .. يبيع حطين ..!!
فتوة “بيحمى” شيخ منسر
وبيتاجروا “ف” صلاح الدين ..!!
بيوت الخلق تتكسر
على النايمين ..!!
فا يتعثر ..
بزوغ الفجر .. يتعتر ..
ف زحمة .. موكب السلاطين ..!!
يضيع الحق “ف” الرجلين
ويتأخر .. !!
يموت الحلم .. يتبخر ..!!
نفوق والوقت .. متأخر
نلاقى نفسنا تايهين ..!!
مابين الحق والبهتان
آدان “ع” المدنة بيكبر
ومش سامعين ..
ولا حتى .. كأنه آدان ..!!
ونمسك برضو حدوتة الولد والبت
نعجن “ف” الكلام .. و”نلت”
_ عشان بتحب ..تتنصر ؟!!
_ دى كانت مسلمة و”كفرت” ..!!
_ وهى البنت “ح” تأثر ..؟!!
دى أحسن منها .. بيكفر ..!!
_ يا عم إستنى ..
دى مش بنت .. ده الشايب ..!!
بتسرقنى ..؟!!
_ ياعم دى بنت صدقنى
_ أصدق مين .. مانيش أعمى
تقوم العركة ع القهوة
وعركة زيها “ع” #الفيس ..!!
دخل يشتم “ف” 6 “إبليس” ..!!
وردوا عليه لجان تانية
“بأوسخ” كلمة “ف” القواميس ..!!
فا “منشن” .. كل اصحابه ..!!
وزاد الألش ..والتأليس ..!!
“ع” الخطبة اللى من ساعة
“ع” الشماعة .. والتهييس ..!!
و”ع” البخت اللى .. خلى “خميس”
بتعشق “عمرو”
“ع” الكلمة اللى جات بالأمر
“ف” التليفون ..!!
وقالها بدون مايتردد
و”ع” الخلق اللى بتحدد
مصير “أمة” ..
فا زاد الكرب والغمة ..
و”قيح” جرحنا و”مدد” ..!!
وخلوا الريق “مرار طافح”
عشان “المدة” تتجدد ..!!
