3 ساعات.. قصيدة بالعامية المصرية للشاعر: عبد الهادي هاشم النجمي

مابين الرحمة ومابين

جهاز الكلي الصناعي

3 ساعات يااصدقاء

والعين ساكنة الجهاز

تترقب الحركة

3 ساعات

خراطيم ماليها

الشجن والحب

والخوف من صوت الجهاز

لو زعق

انادي ع ( المس ) واترحم

الحقي عقلي اللي شارد

وانا

قريب قوي ع الموت

كيف اخد القرار

والجنب اليمين بيئن

من كتر الاحمال

وفين الفرار

والدم هارب لامحاله

3 ساعات يااصدقاء

باعود القلق

واقرقش كل الذكريات

اهرب من جهاز الكلي

للشعر والقصة والاخراج

3 ساعات نايم ومش نايم

جوايا الامل صاحي

وانا المستخبي ف جراحي

اقرا المعوذتين واية الكرسي

وادعي صاحب الارواح

مايقطع للكهربا تيار

3 ساعات ياصدقاء

باقول جواي واموت ساكت

وانا اللي كنت مالي الورق

حكايات

شايف الجهاز مليان بدموعي ودمايا

مليان كمان بالدنيا والاخرة

وكيف الحساب هيكون

وايه العقاب اخره

3 ساعات وانا

ف انتظار الموت

واالشجن

والحب

والاصدقاء واربع عيال وامهم

والخوف من قطع التيار

3 ساعات لافف خراطيم الالم

فوق الجسد مشانق دم

مابسمع غير صرخة سرير

والعمر من تحتي

ودق القلب من فوق

3 ساعات يااصدقاء

والعقل شارد

ف الجهاز والموت

……….

عبد الهادي هاشم النجمي