مُفتَتَح
وعارف إني ما استاهلك
وبرضو بنام
أنا ما املكش غير أحلام
وعارف
وعارف إني ما استاهلك
وبستهلك وقود الحلم
لجل يعاند البُكرة
ومفيش فايدة
…..
بحبك
قد ما بَكُره
حبال الصمت تتعلق
علي رقبة فؤادي
مشنقة
وتحز فيّا
تهزني
إكمن أنا الدبلان
فـ فدان الهوا الأخضر
ودا مقدر
أكون عاشقك
وعارف إني ما استاهلك
لإني رضيت أكون
واحد من الحبيبة
بيسبِّل وبيصفّر
وبيغازل
لكنه في الساعات الجد
متخاذل
وشُفتك يا يتيمة قلبي
معروضة
لمين يدفع
بكام نهديها / رجليها
خدودها الحُمر يا قلبي
وقلب حبيبتي
مين يدفع
وإيه ينفع
ومفتكره إني
واد مجدع
وشُفتيني
فهللتي وكبّرتي
وصممتي
تكابري كل أسيادك وحُسّادك
عوازلي الفرحانين فيّا
حبيبتي مش أنا الفارس
ولا الحارس
أنا ما املكش غير قلبي اللي بيحبك
وبيغازل
عِينيكِ ويَا خدينك
وحاجبينك
فحطيني علي جبينك
وصلي لي
ساعتها يمكن أقدر أفوق
يسوقنى الشوق
لحاجبينك
أرُدّك للفؤاد
نسمة
وأشوفك ع الدوام
بسمة
تقولي إني أستاهلك
……..
حسين عبد الله
