لما خاصمتنى الدموع
واتحجّرت جوه العيون
رغم البُكا
كان المطر
من زمان والنيل واحشنى
من زمان عمّال ألِف
أدور وألف انده عليه
النيل ما كنش له أثر
جرّبتي مره .. بس مره !
يا حبيبتي
المطر إزاى بيخلق
م الحوارى وطميها
والغلابه ف قلبها أحلى نيل
وإزاى بيبقى شىء جميل
جوه عالم مش جميل
النهارده
كنت وسط النيل بعوم
من غير هموم
حُر حتى م الهدوم
كنت نا والنيل صحاب
ومفيش حجاب
يمنعنى إنى ابوح إليه
نظرة عينيه
فيها سر عيونك انتي الملهمه
والقمر شق السحاب
نزلنا
قنديل وشمعة تقيد لنا
مَعرفش ليه
ساعة ما خدني جوه حُضنه
زلزلتني رعشة دافيه
ذكرتني بدنيا كانت مره صافيه
وافتكرت اتنين وبس
أمي اللي ماتت من سنين
وانتي ..
لما كنا ويا بعض
قلبين بيغسلنا المطر
الدموع نزلت ساعتها
من عيوني تسح سح
ياهلترى
هيا دي دموع الفرح ؟
……..
عمر نجم
