قصيدة بالعامية المصرية للشاعر : أحمد عدلي

الحُب أصعب سيرة لمناضل.
قاعد بغني لوحدي من مُدّة
سرحان في صورتك عادي.. باتهجىٰ
اسمِك في غنوة من الصميم الخام
وده مش كلام.. سامحيني ع الخضة..
ممكن قصيدة تعيش عشان نوحي
وانا روحي طالعة يا ريت بقى تبوحي
خايف طوفان الدنيا ينهبني
فـ يا ريت تكوني سفينتي أو نوحي..
جيت لِك عشان أوفيكي بس بكيت
الوقت فاتني وتوهت في الإشارات
صعب المسار.. والأصعب إني نسيت
وطريقنا صحرا ومحتاجين ثمرات..
توهت في عينيكي.. زي ما اتمنيت
في عينيكي شايف خطفة النظرات..
جاي لِك حصادي من الكلام ديوانين
هزرع في صحرا ازاي وانا عاطل؟!
شايفة الكلام تجريح.. لكني صريح
الحب أصعب سيرة لمُناضل..
وده مش مجاز.. جايز يكون تصريح
ف ازاي تقارني مسيرتي بالباطل؟!
تمن الكلام إنسان وقلب جريح
زي اتفاقنا قولي لي إيه فاضل؟!
الرزق سايع قلبي في الترحال
رَحّال بدون ما اتهز ولا خطوة
يبقى انهي أحسن؟! رزقي ولّا المال
شايفة المرار؟! باصين على السطوة..
ابقي اسأليهم.. هيبيعوكي بكام؟!
أنا توهت فيكي خلاص ونفسي أنام
سامحيني جايز جيبي م الأوهام
مابقاش يساع تمن الجرام فضة..
وقصيدتي حُرة وكان ناقصها لجام
وده مش كلام.. سامحيني ع الخضة..
………
احمد عدلي